Acts 9

Sóro Ísun-aaiyavai áraire siráin-kwasai.

1minkánáámá Sóro Ísóigona aampaꞋá kwéguwaiyavena arumbá sáwíꞋa éna tínkamonae síma-simaꞋa kwéena aivaꞋ-mónó-káwáánákónópaꞋa 2koáísaa ena séna aúvái agaimái símínaꞋa maimaéꞋa Támásikasi-naopaꞋo Yútaa-monoꞋ-naumpimpaꞋo máyáan-kwaasiti anón-kwaasi mátíméno súwana owé séna mináímbá agaimaréna séna Sóro Ísuna aampaꞋá kwégwiyawai tivakáá-umai tuwánéna tátoꞋmai tíꞋmaena teémena YérúsaremuvaꞋa ándávaꞋa mátiyuwaniye séna agaimaréna súwana 3Sóro mináúváí maimaéna kweémena Támásikasi-naopaꞋa egwaaꞋá kúmba kwíyómpakemba ságayamba tawáonkaan-tantaaꞋa tuwówana kuména aúgáyáagaya úwana 4tuvamúwana aaigówé suꞋmai séna Sóroo nóra séwa kembá sáwíꞋa kwéono súwana 5emá nááwa seénó súwana kemá Ísuma súmpo kembá sáwíꞋa umásinkaampo 6usásine Támásikasi-naopaꞋa koménana moóráwaimo síndantemba mirán-uwo súwasa 7Sóroemo kun-kwáásí íma aaí sumbá mésa íma kwaási aneꞋá kwéawanesa aaimó súne suꞋmai ísówana 8Sóro usásinomba aúramba íma kaweꞋá umái awánówasa kwaási ayáán-toꞋmaesa Támásikasi-naopaꞋa máánkarowana 9kaumbo-nóꞋwáámbá ména íma aúramba awánéna toómbá nombá íma naráiye.

10Sóro kaumbo-nóꞋwáámbá kwaúwana moóráwai TámásikasivaꞋa ména Ísuna aampaꞋá kúwai áwíꞋa Ánánáesima aúramba karákéna kaainkááníꞋa umái awánómba Ísóigo simámena séna Ánánáesiyo súwana wó séna Ísóigoo kemá úne súwana 11usásine aampaꞋá kwaaó. minánkó áwíꞋa apumó uráin-ampaꞋa kuré Yútásina naaúmpaꞋa kwée moóráwai Táásási-naopakewai áwíꞋa Sóromba koawánaao. kwe námúnaa kwésiye. 12kaainkááníꞋa awánarainkaꞋa moóráwai áwíꞋa Ánánáesi téna aneꞋá tátoraisana aúramba kaweꞋá umái awánaraiye Ísóigo súwana 13Ánánáesi séna Ísóigoo sáwíva-kwaasi kwenáái simásímakaawe. YérúsaremuvaꞋa ená kwaási sáwíꞋa umátínkarain-aimba simásímakaawe. 14aivaꞋ-mónó-káwáánákó aúvái agaimái ámísana ená imáyáa mósá máráan-kwaasi ándávaꞋo tiyuwáíndayavena TámásikasivaꞋa tiráiye súwana 15Ísóigo séna kesí mayáí áménana kesáái kosimátin-tasimatimba óꞋon-daopaken-kwaasiye kawáá-kwáásíyé kesí kwaási Ísareri-kwaasiye kosimátin-tasimatimba ínímba po usásine kwenópaꞋa kwinaná 16kesí mayáí Sóro kwémayainasa kwaási sáwíꞋa umánkanaaowe. mindáyaveꞋa ke agaráárankanaumne Ísóigo siráiye.

17súwana Ánánáesi iséna kwéna sún-daumpaꞋa uména Sóro aneꞋá ayáámba tátorena séna Sóroo kesí kwaásima óne. aampaꞋá kwéte Ísóigo Ísumba awánaraandawaima siꞋmáráísaꞋa túne. aúramba kaweꞋá umái awánenana Áánútun-amanko arupimbá anómba umánkaindayavena siꞋmáráísaꞋa túne súwana 18Sóro aúrampinkemba amanonoí tákúwana aúramba kaweꞋá umái awánéna usásinowana Ánánáesi monoꞋ-nómbá pérankowana 19toómbá násuwena áúgoma kaweꞋá úwana méraiye.

Sóro TámásikasivaꞋa simátímakain-kwasai.

Sóro TámásikasivaꞋa évakaꞋ-noꞋwaamba kwaéna Ísuna aampaꞋá kwéguwaise ména 20avekáán-úwana monoꞋ-náúmpáꞋá uména Ísun-aai simátimena séna áraiꞋa Ísuma Áánútu áánimban-iye súwasa 21kwenáái ísón-kwaasi táátavai ésa moórá-morawai tísaaisaa esa sésa YérúsaremuvaꞋa Ísuna imáyáa mósá máráan-kwaasi tínkamin-kwaasiman-iye. Ísuna imáyáa mósá máráan-kwaasi tíꞋmae ándávaꞋa mono-káwáá-kwáásíráꞋó mátinkanae séna maankáꞋó tiráin-kwaasiman-iye. ÍsumpaꞋa téna máyáiye sésa táátavai uráawe.

22suwaná Sóro asiramái simátímaꞋmae iyéna séna áraiꞋa Áánútumo usásinankaiwaimba amuꞋmaráúndawaiya Ísuman-iye séna kwenááigo iyúwasa Támásikasivaken-Yutaa-kwaasi isésa kwembá íma anondá simámakaawe.

23íma anondá simámúmba sáwívaꞋ-noꞋwaamba kwaésa torupamái mésa Sórona ámááyu-aimba sésa 24tuvuwíyanesa noꞋwáámba kwáyáꞋwái Támásikasi-naokona óntan-kurigona aaumémpaꞋa mésa ontaráꞋá takárákwi-karakwi kwéuwana moóráwai ámááyu-aimba sumbá kosimámuwasa 25moórá-noꞋwaamba Sóron-aai isésa Ísuna aampaꞋá kwéguwai Sóromba powaivímbá áítumai óntan-kurigona avaapimbá túsúyuwesa ándára tátoresa túwówana kumeémena marapáꞋá móruna tuwéna kóuraiye.

Sóro YérúsaremuvaꞋa komérain-kwasai.

26Sóro Yérúsaremu-naopaꞋa kweémena kwéna séna Ísuna aampaꞋá kwégowaise koménaeꞋa kúne súwasa miwí sésa Ísun-aai íma ísaraiwai kampar-áímbá kwésiye sésa kwenáároi inkáísúwana 27moóráwai áwíꞋa Páánápáasi Sóron-aai iséna kaweꞋá úwana áíꞋmaena aantá-kwaasitopaꞋa kwéna Sóron-aai kosimátimena Sóro Támásikasi-ampaꞋo kwégwenamo Ísóigombo awánówana aaí simámakain-aimba simátimena Sóro Támásikasi-naopaꞋo Ísun-aaimo asiramáímo simátímaꞋmaena kuráin-aimba simátimuwasa 28isésa áraire suwaná Sóro miwísé ména Ísuna asirayámbá kwáyowana Yérúsaremu-naopaꞋa Ísun-aai asiramái kosimátin-tasimatin-ena 29óꞋon-Yutaa-kwaasi Kíríki-kwaasi tááivinkemba kwésen-kwaasi simátimuwasa aaí kwésima-kwesiman-esa tuvuwónáe sésa 30ámááyu-aimba sumbá Ísuna aampaꞋá kuwáí isésa Sóromba áíꞋmaesa kweémesa Sísáriyaa-naopaꞋa máankesa sésa Táásási-naopaꞋa kwaaó sésa aiꞋmárówana mindáópaꞋa kóuraiye.

31kóúwasa Ísuna aampaꞋó kun-kwáásímó tínkamumba étínkówasa aánoumai kwempaꞋá maésa Yútiyaa-ayampaꞋa Káríri-ayampaꞋa Sámériyaa-ayampaꞋa Ísuna aampaꞋá kwéguwai aánoumai kwempaꞋá máyówana Áánútun-amankoma túwaꞋnaa úwasa asiramái mésa Ísun-aai simátímúwasa isésa áraire sésa mirá kwéesa sáwíva-kwaasi-iꞋa ésa Ísóigo áwíꞋa mósá marésa kwenaísamaivimba méraawe.

Pítaa Árítaa-naopaꞋa kuráin-kwasai.

32Pítaa aampaꞋá kwénaaena naaóꞋ-nao-kwaasiti naaópaꞋa kwéna Áánútuna kwaási tuwánáíndayavena Árítaa-naopaꞋa kúmba 33moóráwai áwíꞋa Íniyasi ména aambó naaí íma naaéna avakaumboé-ima maisuwéna naaúmpare suꞋmai ména kwégwauwana 34Pítaa awánéna séna Íniyasiyo Ísu Káráísiti asóvamankaivo usásinke ená kwandaaí arusaaó súwana usásinkwena kúwasa 35Árítaa-naopaken-kwaasiye Séróno-naopaken-kwaasiye amápaꞋa awánésa ÍsóigompaꞋa tésa méraawe.

Pítaa Yópaa-naopaꞋa kuráin-kwasai.

36Yópaa-naopaꞋa moórá-ininko ména áwíꞋa Tápítaama póna Kíríki-kwaasi tááivinkemba mináwíꞋa Tókáasiye kwésuwana kwemá Ísuna aampaꞋá kún-inimba aasiyaaí kaweꞋ-máyáí kwémaena óísamba íma makón-kwaasi kwétuwaꞋnaa úwana 37áíꞋa úwana puwúwasa kwenáúma sese umásuwesa maimaésa ávúmayaatanaan-daumpaꞋa móankaraawe. 38Yópaa-naopakemba Írítiyaa-naopaꞋa egwaaꞋá pósa Yópaavaken-kwaasi Ísuna kwaási Pítaa ÍrítiyaavaꞋa tamáyon-aimba isésa kae-kwáásí tiꞋmárówasarai Pítaamba kosimámesarai sésarai isaaisé kesópata tiyó sésa siꞋmáráawakai túye suyaná 39Pítaa usásinena mindáraise kúwasa áíꞋmaesa minínímbá puwúwasa matuwé máyón-daumpaꞋa ávúmayaatanaan-daumpaꞋa íyúwasa PítaanopaꞋa ketorínímbá tayorupamái maésa ívíꞋa tésa Tókáasi íma pukáinkaꞋa aru-símakain-unankwatoiye sésa agarááránkówana 40awánéna séna máápa kárúwaaro súwasa kúmúwana Pítaa kívairena ÍsóigompaꞋa námúnaa simásuwena mégwantena minínímbá awánéna séna Tápítaao usásinaao súwana aúramba kwégararena Pítaamba awánéna usátorauvaꞋa maúwana 41Pítaa kousásinankena Ísuna aampaꞋá kun-kwáásíyé ketoríníné tááyowasa áúvamankomba uawánésa 42Yópaa-naopaꞋa kosimátímaꞋmaesa kuwasá isésa sáwíva-kwaasi Ísóigon-aaiyavesa áraire sésa kwenkáꞋá aráápamai máyówana 43Pítaa Yópaa-naopaꞋa sáwívaꞋ-noꞋwaamba kwaéna moóráwai áwíꞋa Sáímoni kwená naaúmpaꞋa máyowana minkwáásígó kwaan-áúwarasinei kwená mayáí mayón-kwaasigona naaúmpaꞋa méraiye.